【自編自演？】有人用假ig賬戶 宋熙年遭網民踢爆原來係自己開
蘋果日報 2017/09/09 19:00
instagram宋熙年假帳戶
宋煕年自製假ig帳號，但又呼籲大家唔好follow。(ig截圖)
藝人要爭取曝光機會，好多時都要利用網上平台同外界互動，係提高人氣同關注度嘅好方法。不過，今時今日嘅網民個個都好聰明，要呃like絕對唔可以馬虎。
好似今日就有眼利網民發現，同老公陳智燊一樣都好鍾意喺網上貼相貼文嘅宋熙年（Sarah），噚晚係Instagram嘅story上載咗一條片，話有人用佢名開咗個戶口，但就遭網民踢爆原來係自編自導自演。
條片係咁嘅，Sarah攞住電話係咁loop，版面就影住一個有佢10幾張相嘅ig戶口，然後Sarah就旁述話：「what is happening here」，話呢個ig唔係佢，仲叫人唔好follow。
不過，奇怪嘅事就嚟喇，玩開ig嘅朋友都知道（或者係基本常識），如果睇人哋嘅賬戶，係唔可以喺版面做任何編輯工作，而且，當你睇緊其他用戶嘅ig，除咗左上方會顯示用戶嘅相片，右下方係會有你自己嘅用戶相片，但係Sarah影住嗰個「人哋用佢名開嘅賬戶」，左上方同右下方嘅相係一樣架喎，而且版面仲有add friend功能，又可以編輯版面？咁即係點？應該唔駛講到咁白喇…
宋煕年今日接受傳媒訪問時，笑住口咁解釋：「唔係假，係特登開個account拍嘢，廣告公司幫我開個新ig，係props(道具)，嚟緊廣告都會見到個'假' page。」
版面出現「Edit Profile」（紅圈示）及能add friend（左上）， 足見宋熙年用admin身份登入佢口中嘅假賬號ig。
宋熙年所指「人哋用佢名開嘅賬戶」，左上方同右下方嘅相一樣。
原來假ig賬號，只係用嚟拍廣告props。
宋煕年好鍾意玩ig，間中都會派福利。