打女陳鈺芸（JuJu）早排得到奧斯卡金牌監製Roger Corman賞識，首次拍恐怖片演奸妃。

喺新片《深宮怨靈》入面，JuJu飾演因為驚失寵，而陷害其他妃子嘅奸妃，JuJu因為呢部片，同荷李活監製、奧斯卡終身成就獎得主Roger Corman，仲有導演司徒永華結緣，佢話：「當初冇諗過可以被選中演反派女主角，我個樣又唔係大奸大惡，但試戲時監製同導演都覺得我唔錯，好多謝佢哋畀機會我。今次仲得到佢哋嘅賞識，即刻同我再簽多部動作片《猛龍追擊8小時》，仲擔正做女主角。」

JuJu本身係走打女身線，不過今次喺《深宮怨靈》嘅動作戲唔多，佢話：「始終係恐怖片，動作場面都係陷害妃子、宮女嘅拳腳功夫，對我嚟講難度唔大。希望日後有機會拍一邊騎馬，一邊射箭嘅角色。」話晒恐怖片，片場梗會有啲嘢發生，JuJu話今次都唔例外：「有一幕戲講我要自己提燈，行落去個井附近。每次Roll機，盞燈唔係燒Fuse，就係爆燈膽，連續五、六次都有問題。」JuJu仲話有服裝工作人員影到燈旁邊有個黑影，o依家提起都仲有啲驚。

另外，JuJu又呻拍呢部戲整妝好辛苦，每次要搞三、四鐘，拮針拮到生頭瘡，有次要連續拍兩日唔拆得頭飾，主要戲份都係深夜拍攝，但戲服又薄，每晚都係震住開工。

更多娛聞，喺晒《娛果》
http://fb.com/appledailyent