恒隆地產（101）主席陳啟宗出名話人唔使本，上月有分析員出份研究報告，話恒隆喺內地嘅商場選址最差，陳啟宗應該chok住道氣成個月，噚日趁住一個頒獎禮狂鬧分析員水平低。
瑞信上月20日出咗份講內地商場嘅報告，不斷讚華潤置地（1109）嘅商場選址最好，恒隆就最差。
噚日有人提到內地商場競爭激烈，即刻撻着咗陳啟宗，佢自動波係咁鬧，「好似有一份報告，個analyst水平低到不得了，話我哋恒隆地點最差，worst，你話我哋worse都算啦，簡直係天大笑話！」

老臣離職　玄妙解釋

鬼咩，陳啟宗最自豪就係早着先機，當大部份本港地產商掛住發展本港住宅市場，佢就北上做商場，仲要揀親都係靚位。瑞信份報告話佢啲商場選址最差，梗係激到佢生蝦咁跳啦。
為咗加強說服力，陳啟宗仲攞埋彤叔同四叔出來，話幾年前彤叔喺內地返來，打電話畀佢，讚恒隆嘅地最靚，四叔直情話係全中國最靚。
其實邊有上市公司老闆鍾意俾分析員唱衰，香港勝在有言論自由，唔鍾意可以鬧，可以唔畀生意呢間投行做，但唔可以阻止分析員做嘢，分析員都係照住個model做分析，buy唔buy係投資者嘅事，股價反映晒！
至於老臣子姚子賢同高伯遒最近連環辭任執董，陳啟宗好玄咁話：「董事會相當程度上引導過程。」睇嚟雙方傾掂數？

李華華
mailto:[email protected]