噚日，韓國人氣男團JYJ現身上海，為組合夜晚舉行嘅演唱會做準備。喺開騷之前，JYJ就遁例開個記招，同一眾當地傳媒見面。

早前JYJ喺台灣開騷時，就因為韓國方面同台灣傳媒溝通得唔好而發生小插曲，令台灣傳媒突然拉大隊離場，令JYJ都怕怕。所以為免再有同類事件發生，JYJ今次喺上海都醒醒定定，一出場就笑晒咁冧上海傳媒，對傳媒亦有問必答，場面融洽。

記者會上，JYJ3子亦互笠高帽，大讚對方無論喺做戲、唱歌定舞台劇上都表演出色，又話大家各有長處，盡見兄弟之情。而提到金俊秀喺濟州島開酒店做老闆，問到會唔會請成員去一齊度假時，金俊秀：「一早應承咗佢哋係終身免费。」而金在中就話：「既然俊秀開咗口，我哋只要一有時間就會請朋友去嗰度開party。」

不過，朴有天就突然有少少怨言咁話：「即使係终身免費，我估我哋都唔會去得好多次0架喇。倒不如俾幾張優惠卷我哋，等我哋每次去都可以盡情消費，咁就好喇。」講完之後，朴有天就再得寸進尺咁話：「再唔係唔使終身免費我，分少少股份俾我都得呀。」咁搞笑嘅要求，令身邊兩個成員同埋現場記者都忍唔住大笑。