今年以「長江後浪推前浪，生生不息」作為口號嘅《2008年度十大勁歌金曲頒獎禮》將會喺出年1月3日喺九展滙星舉行，噚日喺九龍灣舉行記者會，大會話明長江後浪推前浪，所以成班「後浪」好似Freeze、女新人G.E.M、王祖藍同謝安琪個個第一時間瞓身支持，喺活動上用盡奇招出位博搶鏡，瞓地、跪地同坐地乜都有。
不過前浪又點會任人推，好似陳奕迅（Eason）同楊千嬅咁，唔單止喺大合照時被安排企正中間，仲喺曾志偉悉心安排下，兩個人揸住支咪帶住班歌手錄宣傳片，搞到無綫契仔李克勤同古巨基失色兼無癮。事後同Eason講到有冇信心蟬聯最受歡迎男歌手時，佢就話信心時有時冇，仲自爆呢排腸胃麻麻，見到多人嗰陣就想放屁㖭！

克勤搵錢危機

講到排位，克勤就笑笑口話：「呢啲嘢年輕一輩唔會計較，大家都係玩吓。」問克勤有冇搵老友周慧敏，佢就話：「如果作為真正朋友，錫佢哋嘅話就唔好講咁多，呢啲係兩個人嘅事，唔應該加意見，我暫時都冇諗住搵佢，過一排先算。」問佢有冇中年危機？克勤就話：「我𠵱家淨係得搵錢危機，要積穀防飢呀！」
一向口多多嘅曾志偉，喺台上當眾取笑楊千嬅，話佢有冇獎攞都好，年年都出席頒獎禮活動，難得千嬅大方唔計較，仲笑住話：「唔係我唔想攞，係冇得攞至真，多謝志偉嘅支持，今年我對所有獎項都有信心。」