法國最偉大搖滾歌手、「法國貓王」Johnny Hallyday於當地時間周三逝世，終年74歲，他生前患有肺癌，一直積極跟癌魔搏鬥到底。

Johnny Hallyday於09年曾與杜琪峯拍攝港、法合作電影《復仇》，與黃秋生、任達華、林家棟和林雪有對手戲。Johnny Hallyday在戲中飾演法國廚師Costello，並為遠嫁澳門的愛女一家慘遭滅門而展開復仇行動。Johnny Hallyday的音樂成就都很大，生前曾獲40張金唱片、22張白金唱片，並擁有全球唱片銷售量超過一億張以上的成績，代表作包括《Je te promets》、《L'Envie》、《Allumer le feu》等。

對於Johnny Hallyday離世，任達華今日回覆《蘋果》：「好可惜，好可惜，佢係一個非常風趣幽默嘅人，佢係音樂上嘅天才，希望佢去到另一個地方，繼續留番好嘅音樂喺度，令鍾意音樂嘅人，影響佢哋創作更多更好嘅音樂。」任達華回想與Johnny Hallyday一齊合作電影《復仇》，他說：「當時同佢喺香港拍杜琪峯套戲，大家好多嘢講，戲中講我追殺佢，我仲諗緊戲中同佢一幕幕嘅表演，我因為同佢用英文溝通，所以仲會同佢做吓翻譯。」

黃秋生回覆《蘋果》亦都讚「法國貓王」完全冇巨星架子，雖然跌甩腳骹都忍痛拍戲：「佢好好人，嗰時佢冇乜嘢講，我以為佢性格係咁，可能嗰時唔知係咪有病！同埋嗰時佢好堅強㗎，佢一嚟到跌倒隻腳甩咗骹，一路痛住拍晒部戲，冇話o依o依哦哦，好好，冇巨星架子，佢喺法國真係好勁㗎，勁到3歲到80歲追住架車，好犀利，皇帝咁㗎。我喺法國睇過佢嘅video，佢唱得好好，好有磁性。」

問到覺得「法國貓王」做戲做成點？秋生坦言：「做戲就冇乜特別啦，冇理由話佢好勁，佢都唔係演員嚟。但有機會同佢合作過，好榮幸，佢真係好好人，佢教我上台唱嘢食維他命，佢話拍幾粒維他命C，個人會醒。我話你啲唱rock嘅，聽講話係咪隊嘢㗎？佢話：『唔好呀，我哋上去唔得，教你啦，食三、四粒維他命，成個人醒晒。』自己做戲咪試囉，拍幾粒維他命，個人即刻爆晒。」