你有冇試過，喺公司上網查股價落盤時，突然老細無聲無息咁走埋你個位，想同你傾嘢，你想即時按「Alt-Tab」轉換畫面，可惜已經「按得太遲」……
喺《XocatII討論區》內，會員billy888就提出咗喺公司炒股嘅問題，佢問大家：「你哋怕唔怕俾老細知道，你喺返工時間炒股㗎，我老細好麻煩，成日嚟望望我架電腦。」呢個討論即時引發咗成30個回應。
sdc2005：「唔影響情緒、低調啲都OK嘅。」jimmy1001：「怕㗎。有時大半日甚至一整日，都唔能夠睇市！」
alia：「我又咁睇，老細有時都係『隻眼開、隻眼閉』，員工做工作以外嘅嘢，只要唔過份，好多時都唔理。」
deankwan：「無計，𠵱家炒股搵錢嘅速度快過返工咁多倍，所以我都冇乜理！不過最緊要做咗自己要做嘅嘢咪得囉。」
golfzenith：「至緊要唔好影響工作表現，但都幾難。」
fatpoon新手就提議：「預先set好買賣價，唔玩『即日鮮』，咪唔使成日check價囉。」

病態股民唔理輸贏

不久之前，問題賭徒復康中心總監潘仁智接受訪問時話，病態股民嘅特徵之一，就係花過多時間喺股市，就連返工時間都記掛着上網睇股價，耽誤正常職務；無股可炒時，佢哋會感到失落同無所事事；下一步，可能因為輸錢而向財務公司借貸，但佢哋又因隱瞞家人而變得孤立無援；有啲病態股民甚至唔理輸贏，最緊要有得玩。
潘仁智認為，股民要有承認自己正在賭博嘅心態，先至能夠正面意識到風險嘅存在。事實上，炒股要投入好多精力，而且股市交易時間正係上班時間，難免影響工作表現，有建議就話，最得體嘅做法係放棄炒股，轉為較長線投資；另外，投資世界越趨複雜，透過買基金間接入市，可能係另一個選擇。