廣告B來電，邀約與一位大公司市場推廣總監L食飯。總監L是何許人也，點解要搵埋左丁山？廣告B話：「你識佢嘅，不過十幾年冇見啫，識番個靚女都好吖！」於是如期赴約，廣告B與一位靚女已經在座，廣告B介紹：「佢就係市場推廣總監L嘞！」唉吔，總監L就係十幾年前做資料搜集嘅黃毛小丫頭，女大十八變，今日已係好成熟嘅行政人員，比以前重靚。
總監L話：「左先生，好多年冇見面，當年你指點過我，到𠵱家都好多謝！」陳年舊事，無謂講咯，不過每逢見到舊部上位，升上要職，自己都好開心，證明自己眼光好，識得用人吖嘛。廣告B昔日曾為左丁山同事，今日係獨當一面嘅營銷總監，真叻女。

總監L為大公司工作，有大公司色彩，與十幾年前完全唔同。當年佢住在北角，𠵱家呢？總監L話：「舊樓拆咗咯，搬咗去將軍澳新樓，雖話有千二呎，實用面積比北角間一千呎舊樓細好多，廚房尤其細小，擺唔落阿媽最鍾意嘅大鑊（大牌檔用嚟炒牛河嗰種），限於地方，煤氣爐唔夠大，阿媽想煮大餐都唔得！」新樓貴過舊樓，細過舊樓，此乃香港常態，我哋一介小民，無力改變。總監L想話搬番北角，方便就近返工，但係將軍澳樓價升得慢，北角樓價升得快，由將軍澳搬番北角，要付出溢價，可惜人工冇溢價呢，所以總監L總要諗多幾輪！
與廣告B總監L兩位靚女食午飯，係賞心樂事，拜拜之後，碰到地產經紀W，佢話：「未來兩年新樓供應量減少，每年萬四個單位左右，要換樓就快啲手，樓價實升㗎，供應斷層吖嗎！」經紀W之言，似有數據支持，要詳細分析吓至得，點知手機響起，師傅C話佢啱啱賣咗樓，將新地址話畀左丁山知。師傅C係命相風水專家噃，點解無端端賣樓？師傅C話：「我測到明年局勢唔多掂，即使預測中一半，都要賣咗層樓先！」