由於特首林鄭月娥堅拒撤回《逃犯條例》修訂，日前又在記者會上認同警方對示威學生的「暴動」定性，激發民怨，昨日有200萬人憤而上街遊行表態，導演張堅庭有參加69反送中惡法大遊行，昨日卻選擇在銅鑼灣外圍支持，卻被他發現時代廣場對出停了一部正在漏油的中港大巴，於當時銅鑼灣正有巿民趕往加入遊行隊伍，一旦有人不小心擲下煙頭，就會釀成嚴重意外，阿庭即捉着司機問責，並全程在現場指揮，協助解決事件，網友大讚阿庭「好嘢」（新聞連結： https://bit.ly/2INlGMk）。

全靠阿庭的危機意識強才避免了意外發生，他今日接受《蘋果》電話訪問時說：「我當時見到呢個情況，我立即好敏感，我危機意識比人強，浮現咗一啲意外畫面，我又聞到啲油味，但分唔到柴油定電油，現場好多巿民經過去遊行，啲油又漏到入坑渠，一谷到變氣體，有人掟一個煙頭就好大鑊，會大爆炸，我當然好緊張，時代嗰度人流好多，近地鐵站又旺。」在阿庭指揮下，有人報警，最後消防車到場，阿庭又制止中港巴司機再讓乘客上車，才得以阻止意外發生，有驚無險。

阿庭表示昨日未有加入遊行大隊，他說：「我想走入大街小巷睇下情況。」看到昨日200萬人的遊行秩序井然，阿庭說：「200萬人，人貼人，比起6月9號仲密集，你諗吓大家去洗手間都難，大家遊行中等成幾粒鐘，乜嘢地方巿民遊行咁有質素，我pround of Hong Kong。」

看到200萬巿民上街，政府新聞處昨晚突然發稿，表示特首承認政府工作上有不足，令社會出現很大矛盾，令市民感失望和痛心，為此向市民致歉。但新聞稿中並沒有提到撤回修例。阿庭力斥：「冇得收貨，唔係佢個人問題，係佢能力有問題。」阿庭擔心一旦通過送中條例，香港過幾年自由便會完全失去，他說：「到時政治成為咗交換件，香港冇咗自由，大機構唔會嚟投資，香港啲有錢人肯定走，咁樣會造成好好深遠嘅影響。」

是否仍堅持林鄭要下台？阿庭說：「佢說話、態度同能力都有問題，佢每次講完嘢，巿民仲大反應，民怨更深，佢自己而家相信亦好焦慮，佢得罪晒全世界嘅人，我相信佢最多一個月，等民怨平番啲，應該要落台，佢嘅下台係三贏，對中央、香港同佢自己都好。」

-----------------------------
你撐蘋果 我捐$1
支援反送中抗爭者