羅馬非常有誠意，特別印咗件有簡體字「拜個早年」嘅波衫向中國球迷拜年，仲喺周日對帕爾馬嘅比賽到着㖭！有呢件咁有霸氣嘅波衫，對住榜尾嘅帕爾馬以為食硬啦！點知全場都冇入波，0:0完場。羅馬主場對住榜尾都失分，都唔知關唔關件波衫事，不過肯定嘅係，佢哋維持呢個表現，唔好話要追到祖雲達斯越嚟越冇機，隨時畀後面嘅拿玻里趕上，第2都不保呀！