51歲日本女星齊藤由貴早前被當地爆料雜誌踢爆與已婚醫生發展婚外情，身為有夫之婦嘅佢當時否認出軌，日前兩人自拍嘴咀照曝光，佢即指已作深切反省，又稱為子女着想未有離婚打算。

至於該名50幾歲嘅已婚醫生，主動聯絡日本電視台爆料，接受節目長達75分鐘嘅獨家訪問，佢自認同齊藤由貴展開不倫戀已經長達五年，佢透露齊藤由貴喺7年前陪家人到診所時，認識對方，兩年之後開始發展，佢仲自認係齊藤由貴粉絲。不倫戀曝光後兩人已經分手，佢話：「我仍想保護齊藤由貴，但已經冇可能，講起我就想喊。」不過佢話醜聞令屋企人備受壓力，只想向屋企人道歉。

而喺醫生爆料後，齊藤由貴透過事務所發聲明道歉，佢都承認不倫戀，話已同對方分手，並為搞婚外情致歉：「我會承擔所有責任，亦有心理準備會在工作上受到懲罰。」齊藤由貴話當日喺記者否認都係為咗小朋友，而佢已經與丈夫道歉承認一切，今後亦會以小朋友為先，雙方努力修補關係。對於被雜誌《週刊文春》同《FLASH》刊登咀嘴同偷拍咗拍拖照，齊藤由貴話將會採取法律行動，現時不便多談。