當年今日

地產多聲道:售樓處就腳 購物變買樓

蘋果日報 2002/01/07 00:00


發展商近期又增加優惠促銷樓盤,但原來售樓處位置對銷情都會有影響。蘭西聽九龍倉(004)講,佢哋嘅九龍站擎天半島因為售樓處同示範單位都設喺港威大廈,所以周不時都有啲逛商場人士順路參觀同買樓,好似元旦日就有個公務員,原本只諗住行街買份禮物畀太太,但經過代理大力游說,最後變成買咗層樓,佢太太收到呢份大禮,當然係最高興嗰個啦。
近年發展商賣樓難度愈嚟愈高,自然要睇實個盤嘅情況訂出最新部署,所以好多公司嘅大老闆都會落地盤巡視。最近假期好多老闆級人馬都放假外遊,但聽講永泰亞洲嘅鄭生一返香港就落地盤巡視,了解市況,可見着緊程度。
蘭西重聽好多人講,永泰亞洲嘅樓盤喺設計同用料水準都好高,有咁好口碑,相信佢哋去貨應該唔係咁難嘅。
蘭西