唔少港人深信風水,所以買樓前都會搵風水師睇吓,若果單位風水配合自己,就算畀貴啲都冇所謂。
通常豪宅買家最肯畀錢請風水師睇樓,但估唔到,原來連百零萬嘅居屋單位,都有買家請風水師睇風水。
世紀二十一李志江話,藍田一個居屋客,啱啱賣咗持有嘅康雅苑八百二十呎單位後,諗住換同區私樓,重請咗城中出名嘅蘇姓風水師幫手,揀出區內好風水嘅物業。但係睇咗好耐,都搵唔到啱心水單位,後尾連居屋都睇埋。
風水師話,喺康雅苑隔籬嘅居屋康栢苑,B座高層二室,單位有海景,樣樣都夾佢,幾乎畀到滿分咁滯。個客於是同業主傾價至深夜,終於以自由市場價一百七十八萬成交,單位七百一十呎,呎價二千五,高同類單位市價一成。
屯門市廣場揀客
信和屯門市廣場人流量極高,其中三成係十八至二十八歲後生仔,為咗針對呢班年輕消費者,信和希望個場可以賣啲跟得上潮流嘅物品,所以將商場一期二樓闢做「潮流堡」,共有十個面積約三十三呎嘅流動展銷亭,月租六千蚊起,專賣啲至潮至in嘅物品。
信和陳欽玲話,「潮流堡」設計同顏色都比商場內嘅車仔檔in,租金又平啲,所以租客要帶埋產品畀佢哋睇過,佢哋認為滿意至肯出租,暫未定優惠期至幾時完。