【新增內容】

謝霆鋒、小S同「而我不知…」陳偉霆（前名「的士陳」），今日竟然落區派飯！

阿廚神謝霆鋒最近為慈善，拉大隊返港拍攝新一輯《12道鋒味》，之前佢哋已經拉大隊去尖沙嘴謝霆鋒間Pop-up Store拍攝，今午三點幾就落區去深水埗明哥間北河燒臘飯店派飯，但因為場面太混亂，到現場後為免影響店舖運作，故決定取消，改為去附近街市、石硤尾街增煇菜館外面拍攝煮嘢食場面。

因為謝霆鋒真係吸引太多fans，小S同「而我不知…」一樣有號召力，話咁快就一街都擠滿人，行人路亦封咗唔俾人行，喺嗰個位間咗個臨時街邊廚房，供霆鋒賣弄廚藝。

拍到六點左右仲拍緊，暫時只見霆鋒切菜。行人路上仲擺咗六張枱，大排檔格局，嚴禁路人甲乙行近，但未知是否之前已申請封街拍攝，現場只有身穿「鋒味」制服嘅工作人員維持秩序，一有途人行近就點佢哋行番去對面馬路。

喺煮餸之前，明哥過咗去同霆鋒傾咗兩句，又握手又合照，無耐霆鋒煮完餸，自己收拾啲廚具，抹抹把刀就交番俾助手收埋。

講番個節目，現場分開兩邊廚房鬥法，俾霆鋒同其他嘉賓煮餸俾婆婆們食，品嚐咗一輪，婆婆們就用一個心形牌嚟投票，驟眼睇票數相近，不過估計霆鋒最終都勝出，又食又玩拍攝完畢，霆鋒就同班婆婆一齊影大合照。