4月，似乎對龔如心同王德輝嚟講都唔係一個好月份。王德輝兩次被綁架、龔如心病逝，原來全部都巧合地喺4月發生！1983年4月22日，報紙頭條報道一位姓王嘅地產商被綁架8日，其妻付出1,000萬美元贖金之後先至獲釋，單嘢轟動全港。呢位王先生，就係王德輝。
當年全港都日日追看呢單新聞，同𠵱家龔如心千億遺產爭奪戰一樣係全城焦點，不過當事人同警方都好口密，唔肯承認王德輝曾經被綁架。點都估唔到，事隔7年，王德輝再喺1990年4月被綁架，從此音訊杳然；17年後，兩公婆仍然係港聞頭條人物。