政府在去年落實通過地契條款，要求發展商於合適的發展項目加入戲院一環，立基國際集團旗下的UA娛藝院線，即宣佈將開設青衣、大埔及深水埗3間新戲院以響應。青衣新戲院更設有鐳射投映技術、D-BOX動感電影系統及杜比全景聲音響等嶄新設備。立基國際集團有限公司集團行政總裁及執行董事Jake（許丕績）表示，希望與同事一起實踐「不進則退，求創新」的理念，透過4個C的管理技巧，令服務及硬件上都有所提升，保持競爭力並帶領行業進步。

Jake所管理的立基國際集團有限公司，旗下主要分為4個業務，分別是UA院線、餐廳、CityLine及十字牌牛奶。其中戲院的發展潛力比較大，Jake表示：「最近喺青衣新開嘅戲院，因為該區以家庭客為主，所以我哋喺設計上會有所配合，例如有腳踏嘅雙連座；喺食物方面會加設兒童餐，戲種則會以動畫及喜劇等合家歡嘅類型為主。」他指新戲院要隨着時代進步，除了科技上有鐳射投映技術及D-BOX動感電影系統外，亦要瞭解用家所需，而作出合適的配套，以人為本最重要。

除了戲院的革新外，Jake表示近年另外幾個品牌，都在推行轉營及擴充新業務的措施，「我哋本身有泰菜及西餐廳，去年就開多一間十字冰室，用十字牌牛奶為主題，製作相應嘅菜式。喺CityLine方面，其實已經唔只做售票業務，近年仲會接網頁及應用程式製作嘅工作，開發更多層面以配合市場嘅需要。」

Jake之前從事資訊科技電訊業近16年要負責市場營銷的工作，「我想接受多啲挑戰，於是去咗7-11公司做採購及發展新項目嘅工作。直至13年底，我想試吓將自己嘅管理及發展技巧應用喺唔同嘅產業，就再轉公司。」他於14年加入立基國際集團當上CEO，同一時間管理4個品牌，他表示很有挑戰性，「呢4個品牌喺日常生活都會接觸到，除咗可以測試自己嘅能力外，仲想用使用者嘅角度，為業務帶嚟改進。」

管理要4個C
上任後，Jake用了半年時間了解各個範疇的業務內容，「我覺得幾新鮮，但都有啲唔適應，因為以往做電訊業嘅溝通係講求快及新，嚟到呢度就要與同事重新適應，多咗面對面嘅溝通，大家要磨合。」在管理上，Jake強調4個C的管理技巧，「我希望同事喺工作處事上具備Curiosity（好奇心），對所有事都要有求知精神，熟知行內相關嘅動向；Creativity（創意）就係參考最新嘅科技，同時要考慮點樣應用，按需要而設計有創意嘅方案；Commitment（承擔）即係想同事對公司嘅工作投入，做到最好；最後係Communication（溝通），日常工作上除咗要與客人溝通外，對上司都要有present技巧先表達到自己嘅意見。我希望同事會有呢4個元素嘅概念。」

其中溝通一環，Jake尤其重視，他的管理之道乃雙向溝通，讓員工了解自己的想法之餘，他都會花時間去聆聽。現時的員工大多是90後及00後，少不免會有代溝，Jake表示從未擔心過這個問題，更會不恥下問。

吸納員工想法
「前年公司舉行嘅Smile Campaign活動，畀公司嘅高層到前線工作，親身跟前線同事學做日常工作及跟進流程。從中嘅溝通，可以明白到佢哋嘅諗法及價值觀。嗰次我唔識炒爆谷及唔識用各種掃地工具嘅用法，甚至有啲潮語唔明都會問佢哋。」Jake喜歡發掘不同人的特點，他很快便和員工打成一片，這個活動更激發他與年輕員工一起開會，吸納他們的新穎想法。

立基國際集團的餐廳包括泰蘭花、Madison's及十字冰室，其中十字冰室的誕生，Jake表示全賴一班年輕員工的努力，「我哋成日都需要一啲新諗法，貼近年輕人嘅思維會比較好，好似之前我哋想擴充業務，佢哋提議與其開分店，不如開發新路線。近年好興本土文化，茶餐廳及冰室都好有市場，冰室傳統懷舊，更加可以用埋十字牌嘅奶品製作雪糕、燉奶及奶昔等，開張後反應都唔錯。」

與同事去試菜
Jake更會與一眾同事親自試菜，並加以調整，「冰室一開始嘅嘢食太西化，於是我哋去坊間唔同嘅冰室，參考人哋嘅做法，同時會與廚師構思一啲創新獨特嘅菜式。」

Jake身為集團行政總裁及執行董事，現時年薪超過100萬，在管理多個範疇的同時，他很多事都親身去做，全因他很明白不進則退的道理。他希望建立一個愉快的工作環境，令同事投入工作，發掘多些新事物並融入工作中，以此尋求進步。「雖然近年嘅流失率低，但戲院及餐廳嘅前線員工依然好缺人，希望畀多啲機會年輕人，吸引佢哋入行。」

後記：沒有距離感
採訪當日，原以為身為CEO的Jake會比較嚴肅，豈料他十分隨和，除了介紹戲院的設施外，還不時與我們討論最近看了甚麼電影，一說到電影，大家更是興奮得忙了彼此的身分，完全沒有距離感。可能Jake就是想打造這種輕鬆的工作氣氛吧？這樣的環境定能促進工作效率，那記者現在先去看套電影！

搵好工，即上www.ecjobs.com.hk