恒指連升9日，但動力減弱，全靠滙控（005）同中海油（883）頂住，方能保住7點升幅，收報14794，成交退至204億元。
恒指日線圖昨日又出現一顆十字星，9RSI升至84之上，即使奮力再上，相信幅度亦有限，如能先作調整，後市升勢將會更健康。當然，大市中期升浪已然確認，不少人等調整買貨，調整即使出現，亦不會太深，估計300多點左右便已足夠，到時要買恒指C輪。
地產股是日表現虎頭蛇尾，近日確實升得太急，回吐十分正常。花旗銀行出報告建議沽售太古A（019），理由係利好因素已反映，小心類似的報告陸續有來。
國企指數再升34點，報5173，但主要靠中石油（857）同華能（902）頂住，升勢並不全面。午後江西銅（358）停牌配售股份，據聞配售價會較停牌前股價4.1元折讓5-9%。國企配股，配售價必須高於每股資產值，江銅抽水後，股價高於每股資產值的國企會有一定壓力。
內地今年內第3度調高航油價格，趙飛雲晨早睇完新聞後，改變咗主意，暫時唔敢低吸內地航空股，睇多一兩日至算。