有冇試過辭職嘅時候，啲客同埋隔離team唔捨得你仲多過自己部門班同事？

普遍上司對下屬辭職依然抱有一種殺父仇人嘅守舊態度，覺得你對唔住佢、背叛咗佢，甚至係落佢面，然後佢會開始同你部門其他同事密密斟，作出一啲工作上嘅安排，嗰種氣氛會令接棒嘅同事覺得：「真係麻煩，又要做埋佢嗰份。」

我試過，我真係試過。辭職之後，上司嘅面口唔同晒，仲即刻同自己部門嘅人疏離咗。嗰種感覺好奇怪兼難受，相反啲客同埋隔離部門同事反而會關心、理解，甚至覺得失落。當然都同「相見好同住難」嘅道理一樣，唔係拍住做嘢會少啲磨擦，甚至可能係偽善，只係識做人先講唔捨得你，不過作為並肩作戰嘅隊友，難道就唔可以為離職嘅下屬或同事大方送上祝福咩？

每個人都有自己嘅路要行，各自有屬於自己嘅人生，選擇辭職亦唔係一個輕易嘅決定，作為上司同埋親密戰友，實在應該了解一下同事辭職嘅原因。如果對方有更好發展，何不慷慨送上祝福？狹窄嘅胸襟，小器又鑽牛角尖，只會令離職嘅同事更覺選擇正確，何況天下無不散之筵席，每個人都有走嘅一日㗎啦……我指辭職。

專欄作者簡介：
辦公室日報　聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/