吳斌話私隱專員公署每年獲撥款少過平機會一半,暗示冇咁多錢可以俾佢亂使,所以花錢非常謹慎,唔會隨便出差,佢上任以嚟每年平均只出差五次,一年外訪支出大約14.4萬元,呢個價錢,平機會隨時一次使凸。
吳斌又話,公署每次出差連埋佢都只得兩個人,唔會成村人出發,更強調與同行職員睇齊,自己只係住宿最基本標準房,唔住總統套房;今年2月去新加坡開會,佢同職員兩個人都係用飛行哩數換經濟位機票,慳番機票錢,總之專員同職員平起平坐,住平房、坐平機,公平過平機會。
平機會搞活動動輒花幾十萬元,私隱公署6月舉行嘅亞太區私隱機構論壇預算只使5萬蚊,咁慳家,難怪吳專員話唔驚審計署查數,歡迎放馬過來。