【新增動新聞】

近排唔止各大富豪名人鬥簽名支持立「港版國安法」，連名校舊生都要落水保證自己緊隨黨嘅路線。噚日有一班「我們是一群喇沙書院跨年代的舊生」喺《星島》A7版落廣告，話自己「堅定支持」訂「港區國安法」同「堅決捍衞」一國兩制兼國家香港繁榮安定。話口未完即刻有一班「不願被代表的喇沙仔」同佢哋打對台，星期六喺《蘋果》用「國家克己　香港復禮」做大題落全版廣告，表明反對強立《國安法》，因為「人性良知 絕不妥協 一息尚存 絕不折腰」，呢班校友踴躍課金落廣告回應，都係想表達喇沙唔會得一把聲，呢個就係愛國陣營日講夜講嘅「freedom of the speech you hate」（你所討厭言論自由），仲要佢哋「唔好代表我」因為「喇沙仔好小氣」。

個廣告都落咗番工夫設計，邊皮位全部係細字hashtag講晒喇沙仔心聲：「聯合聲明完喇」、「一國兩制完喇」、「要香港跟返大陸嗰套不如叫人類用返四隻腳行路」等等。八方數過，字數計呢愛國隊38個大字，反國安法隊37個大字輸一粒大字，但勝在細字多到數唔晒，內容就比對家多。不過最抵死係，呢班喇沙仔嫌愛國校友連落廣告都輸畀宿敵男拔，事關早幾日有班愛國DB仔不具名喺《經濟》落咗個A1頭版撐國安法，搞到不甘被代表嘅DB仔立即具名聯署反擊。人哋A1你就A7，問你哋班愛國校友好唔好意思喎，唔知跨年代舊生們要唔要回應吓你哋嘅師兄弟呢？

-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多