星皓電影投資《西遊記女兒國》，噚日一眾演員馮紹峰、趙麗穎、羅仲謙同梁詠琪等，由導演鄭保瑞帶領去第二十屆上海國際電影節，而身在泰國拍新片嘅天王郭富城就未能出席，更連踩兩場，去埋「微博電影之夜」，以及星皓電影與意大利時裝品牌CREAZIONI跨界合作舉辦嘅時裝展同派對。

活動喺上海著名優化藝區1933老場坊舉行，現場有30幾個model，在十米高嘅女王海報下，展現過百套電影主題訂製服，讓大家見識到古與今交融嘅魅力，盛裝出席嘅有馮紹峰、趙麗穎及小沈陽等，在台下睇騷期間，不時悄悄交流心得。

梁詠琪噚日搭早機去上海，連晚飯都唔切食，喺派對逗留到晚上12點就離開，連續兩日要凌晨5點起身準備，梁詠琪今早去機場，點知上咗機先被通知航機故障，要改搭下午機，搞到計劃大亂，因為梁詠琪原本要趕返香港為周末到大陸開show做綵排：「唔單只我，謙仔都同我同一命運！」。

出年大年初一上映《西遊記女兒國》，今次投放超過500萬宣傳「進擊上海」，全城上千幅電影彩旗廣告，貫穿30條主要幹道，20架主題大巴巡遊一個月外，電影公司更在外灘竪立七千平方米巨型LED廣告，將黃浦江化身成女兒國宮殿同子母河，令全上海市二千多萬市民同呢段時間去當地出席電影節嘅業界同海外嘉賓可以親身感受到，並對電影更期待。