【本報訊】正抗癌的民主黨元老司徒華昨日坐輪椅出席遊行，其間一度遭市民狙擊，遊行出發前被擲「陰司紙」，華叔一度與不滿民主黨的市民舌戰。表明早有心理準備遭個別市民咒罵的華叔，坦言只會對挑釁一笑置之，「佢哋咁做，只會激勵我更加堅定，佢哋講嘅嘢都冇道理，我何必嬲呢？」華叔接受訪問時，有市民指控民主黨出賣港人，華叔即場反問該市民：「賣咗你？賣咗你幾多錢？你係豬係狗，畀人賣o架？」

「激起更高昂嘅鬥志」

剛展開電療抗癌的華叔昨午在義工陪同下，在遊行前半小時坐輪椅抵達維園，並遊行至富豪酒店才乘車離開。華叔出發前，有市民高舉「民主黨出賣港人」標語抗議，華叔則在民陣帳篷下接受訪問。華叔指，質疑民主黨出賣民主的人，「政治智慧同政治道德都唔夠水平」，因為民調顯示逾六成市民支持該黨提出的改良方案，又指民主黨與中央「枱底交易」的指控無證據，「係屬於誹謗」。
有向民主黨抗議的市民對華叔高喊「祝你早日康復！」華叔即說：「多謝你嘅祝福。」怎料該市民說：「我唔係祝福你，我係期望你受歷史嘅教訓同審判。」華叔聞言後未有動氣，只說：「邊個會受歷史審判，大家放長時間睇。」華叔事後稱，不會因個別無理指控感到不快，「佢哋咁做，只會激起我哋更高昂嘅鬥志」。