雖然今晚（28日）快活谷有馬跑，但一眾現役騎師今朝都有到馬場，為各廐戰馬摸番轉，作好準備。

最多動靜莫過於年輕好手祈普敦，佢一共為六駒進行操練，分別四匹嚟自大摩，同兩匹嚟自沈集成馬房，其中「小米周」（沈集成馬房）、「靚加加」（大摩馬房）及「合一」（沈集成馬房）都已經報咗名周六（7月1日）回歸沙田日賽。

出戰四班泥地1800米嘅「靚加加」料係祈普敦全日搏馬重心所在，事關前仗贏田泥1650米打開首次勝門，就係配祈普敦，上仗落敗基於排14大外檔，如果今仗增程之下，抽一個比較貼近內欄嘅檔位，呢匹馬季內再贏多場，相信指日可待。