大家都知蘋果年度大發佈會又到了，日期是今年9月12日（即香港13號凌晨），好期待的新iPhone又來了啊，傳聞今年有平價版iPhone「egg時」，聽講仲有平價新Mac Mini、MacBook Air Retina，網上更率先洩漏相信是第四代Apple Watch最新設計，最新錶面；第四代錶面變大，可以顯示的東西更多，圖中錶面上資訊功能之豐富可能是想表達隻錶真係做到好多嘢㗎！

撰文︰盤古目

你睇！右上有溫度計有埋彩色bar顯示熱定凍；右下睇日出日落時間，嘩，望真啲，仲有幾耐至日落都倒數埋；左下晒新功能紫外線指數又有埋顏色bar教你睇依家指數高定低好定壞；左上睇到計時器，倒數一目瞭然；時間刻度圈唔好嘥，顯示埋嚟緊嘅appointment，噢，好細心呀連地點都講埋；中左可以望望首歌播到邊，中右仲同時睇埋個健康圈今日跑數跑成點，中上出日曆，中下見星辰曆，一個畫面同時有10個功能，犀利了我的錶！傳統機械錶邊做到咁多嘢吖⋯⋯事到如今，真的唔得閒唔好望錶。

第一眼望，這是真官圖嗎？真的是Apple Design嗎？顯示如此密集，感覺冇唞氣位的樣版，令人想起從前Steve Jobs挖苦對手時說的壞設計，more is less，華氏52度至89度的參考上下限有甚麼實質功能呢？UV值不可以簡單的用顔色顯示高低好壞嗎？是不是末日將至要倒數每一個日出日落？appointment豆豉咁大粒字是炫耀Retina屏幕還是測試用家視力，會不會為亞洲語言介面如中文、泰文買家送放大鏡？

就如演講教學經常以Steve Jobs及Bill Gates的幻燈片作比較，Steve 的多圖小字簡潔清晰，觀眾一眼睇晒後，焦點自然回到講者身上；Bill跟絕大部份凡夫俗子一樣，希望將整個故事放上佈幕，但資訊過多，反而令觀眾難吸收難集中。

想像如果在Steve Jobs年代真的要推銷這個Apple Watch介面，他可能會在發佈會上示範一下，展示其可能性，但未至於會將視覺上不是盡善盡美的介面當作官方圖。不過説到底，Apple Watch是第一款未經Steve Jobs殘暴蹂躪、千雕萬琢而見世的產品，是蘋二代Tim Cook引以為榮的幸福BB，無論如何都會大賣特賣，今個聖誕消費季仍是會有上千萬果粉不假思索的把它拷在手腕。