楊焉、陳蕊蕊同王宗堯稍後會參加「EnergyFight2013」拳賽,今日佢哋喺佐敦一齊出席揭幕禮,仲一齊簽承諾書要全力以赴。
王宗堯話打拳賽都怕受傷,都想好似楊焉同蕊蕊咁有人錫,問到蕊蕊屆時男友金剛會唔會捧場?佢話未知,咁有冇搵金剛做靶練拳?佢話:「冇,練拳都係搵返識打嘅人好啲,怕打親人受傷就唔好。」而楊焉被雜誌影同佢一個圈外男仔行街,問係咪佢男朋友,佢就話:「唔係,大家唔好嚇親人,搞到有機會發展都嚇走人。」陳靜之前返咗香港,問王宗堯有冇同佢聯絡?佢話:「我有睇報道,但冇聯絡,等佢好番佢自己會蒲頭搵朋友,大家畀啲時間佢喇。」