唔少政界中人今日心繫選委會選舉，梗係啦，皆因未來嘅特首會係點，選委手握嗰票都好關鍵，唔通因為咁，令到公民黨黨魁楊岳橋（AY）都心不在焉，出席《城市論壇》都遲咗到？

今日中午舉行嘅《城壇》討論特梁特唔爭取連任，邀請各黨派人士出席，主持人蘇敬恆喺節目開始時就話AY仲未到到。咁啱呢集《城壇》喺九龍城賈炳達道公園、而唔係向來嘅維園舉行，唔通AY去錯地方？

就算唔齊腳，節目都要按時出街，民建聯周浩鼎第一個發言，好在節目開始咗約5分鐘後，AY終於嚟到嘞，佢坐低抖啖氣回魂後發言，第一句就SAY SORRY，話自己蕩失路而遲咗。

八方問過AY，原來呢次係佢第二次去賈炳達道公園，對上一次已經係幾年前嘅事，難怪唔認得路嘅！