噚日市場焦點係賣地，有樓揸手嘅業主，有理冇理都話要等賣完地先至扑鎚，諗住借勢托高個價。好似冇雷公咁遠嘅大嶼山愉景灣，就有個外籍業主吊高嚟賣，明明一早同個買家傾到八八九九，連票都收埋，但就點都唔肯簽約住，博賣地成績理想可以乘機賣貴啲，甚至吸引其他買家搶住接貨。
點知賣地後市場冇乜動靜，尤其愉景灣呢類隔涉得嚟又有24小時交通接駁、居住環境閒逸舒適得嚟又比較冷門嘅區域，影響就更加輕微，業主態度即時回軟，拿拿臨叫個代理約埋買家出嚟簽約。好在個買家並冇以牙還牙，好有誠意買間屋，最終順利以先前傾開個價成交，盛惠2270萬。

美聯潘慶樑透露，成交洋房屬一期朝暉路單號，2585呎，呎價8781蚊；原業主早喺91年以418萬元買入，揸咗15年升值4.4倍。業主雖然勁賺1852萬，不過有錢邊個會嫌多，原先諗住賣完地之後可以賺盡啲，搞到差啲賣唔成，蘭西喺度奉勸業主，有心賣樓就唔好咁大貪啦！