黃又南同馬在驤今日喺銅鑼灣出席天梭錶第18屆亞運會打氣嘅活動，兩人聯同四位女dancer齊齊喺街頭跳舞。

今年20歲嘅馬在驤正係澳洲大學修讀機械工程系，佢話暫時冇簽任何模特兒公司：「有job都係直接搵我，自己都有興趣做幕前，不過會堅持完成學業先。機械工程都有興趣，如果唔係都唔會揀呢科啦。」

記者笑問讀機械工程係咪冇乜女同學，好難識女仔？馬在驤話：「都有嘅，但係冇男仔咁多，自己依家都冇女朋友，其實讀呢科好多功課做，又要日日游水。」但係佢就話學校其實都有好多靚女同學。

同場嘅黃又南賣口乖大讚品牌為亞運設計嘅手錶好有意思：「我自己之前都設計個手錶，其實真係唔容易。」佢仲話自己買嘅貴手錶唔多，最貴係接近六位數字：「我覺得人生有一隻就夠，純粹都係自己鍾意，唔係為咗投資，因為我都冇乜投資運。」

黃又南自爆多年前買樓花都試過蝕錢，所以對於投資同賭博都冇乜興趣：「依家嘅目標都係想買個單位俾媽咪，佢辛苦左好耐，讓我呢個頑皮仔都唔容易，係時候要養返屋企人。」不過佢就話香港嘅樓太貴，計劃都係由細而起：「最少都要有一個單位，投資就真係冇乜運，就算同啲朋友玩，我都係魚腩部隊。」

精選娛聞，喺晒《娛果》
http://fb.com/appledailyent