劉嘉玲、關之琳、鍾鎮濤、容祖兒、陳展鵬、單文柔等今日喺會展出席一個午宴，今日容祖兒似乎不在狀態，佢笑笑口話：「我有啲胃痛，同埋媽咪今朝9點叫我起身，嗰刻嚇一嚇，加上10月出碟。」

祖兒連日奔波，上周去完台灣再去佛山，一返港就迎接「山竹」，佢話：「好彩屋企有閘，但都被吹到彎咗第二日，見到出面啲路爛晒，好多枯枝，媽咪見到都好唔開心，一個夜晚乜都冇晒，好似打仗咁，我仲暈屋浪。」

不少打工仔一打完風都無奈要返工，祖兒話佢都有返：「有呀，公司冇要求我開工，非常體恤，但工作本身安排咗。」此時其助手向佢示意：「你嗰日係做facial。」祖兒竟然接得住，仲即刻笑笑口話：「做facial等於返工，日久失修，趁放假就大修下。我當時斷咗片，上到床瞓著咗，擘大眼就做完facial。」

剛喺大陸為節目《我是演員》擔任評判嘅嘉玲，佢話因為「山竹」嘅關係，怕有延誤，所以提早錄影：「好感恩屋企冇受影響，我最擔心兩棵年長嘅樹，不過好彩冇事。」老公梁朝偉負責睇屋？嘉玲話：「佢都唔喺香港。」

嘉玲謂稍後同偉仔去外地度假，欣賞楓葉：「我比較多嘢做，佢就可以一、兩年唔拍都得。」係咪幫緊偉仔搵經理人？嘉玲表示仲未，笑言偉仔好依賴佢：「我都應付到，不過我都會繼續幫佢物色經理人。」

同場仲有關之琳，佢下周一就56歲生日，眾友人亦已陸續請佢食生日飯：「加上又係中秋節，同朋友賞月，食飯，傾偈同飲洒 。」有冇男士邀約？「冇，呢啲日子咁敏感，（約你都唔應承？）又唔會喎，不過兩個人會好悶，多啲朋友會好啲。」

精選娛聞，喺晒《娛果》
http://fb.com/appledailyent