停賽復出唔起孖就唔係潘頓啦,第三場潘頓贏完大熱門高廐「歡樂一生」,到第六場四班千六米佢贏埋5.4倍次熱門容廐「贏男」,季內五度刑滿復出例牌起孖,唔到你唔信!
無巧不成話,「歡樂一生」及「贏男」上仗都係第二,今日潘頓一次過幫晒兩駒補中,上季冠軍騎師越來越有大師級風範。
「贏男」同潘頓都算天生一對,人馬季內攜手四戰兩勝兩位全上名,暫時冇其他騎師贏過此駒,容廐繼上個月尾勝出「傲飛星」後,今日再有「贏男」建功,兩隻熱門都由潘頓經手,容天鵬季中成績欠佳,這位低潮男季尾明顯復蘇做番贏男。今場跑第二係「綫路財星」,爆完冷加咗分,再出落飛第二算有交代,第三、四名分別是「騏名燈」同「駕悅」,四重彩派23,425元。