許志安、雷深如（J.Arie）今朝喺山頂出席一個行山節活動，安仔早前為活動拍攝MV， 佢直認唔係行山高手，平時行bb班路線，反而會同太太鄭秀文一齊跑步多。安仔定下目標，明年想挑戰毅行者，預計行30個鐘頭，至於人腳方面，佢話：「希望搵三個拍檔，但人選絕對唔會係BIG FOUR啦，有一、兩位都做運動麻麻，可能Edmond（梁漢文）ok嘅。」因為行程太激，暫時唔會預埋太太。

好友張衞健開到口想喺台慶攞獎，安仔話：「聽講去就有獎攞，唔知佢去唔去呀，但我衷心希望佢得到獎項，對於新人嚟講係一個好好鼓勵同發展，攞唔到佢亦都永遠永遠係我心目中視帝，同周潤發睇齊，唔得嘅話就明年再拍，繼續努力。」而安仔已好耐冇拍過劇，都想重拾呢種感覺，因為依家多咗唔同合作，不過就拒絕同張衞健合作，仲話：「佢對白講得太快，我接唔到，唔好搞我。」

安仔預計聖誕節和Sammi在家中度過，早前Sammi透露食咗未熟螺搞到要睇醫生杜蟲，安仔話：「其實我都有食，有一齊去睇醫生，只係冇講出嚟，但冇嘢嘅，條蟲應該畀我胃酸殺死咗。」

精選娛聞，喺晒《娛果》
http://fb.com/appledailyent