電影《特務戇J:神級歸位》 首映禮，今晚喺圓方戲院舉行，出席包括余香凝(Jennifer)、廖子妤(Fish)、邵音音、楊玉梅及麥子樂等。Jennifer坦言因為冇拖拍，所以搵老友一齊睇戲，佢話：「自己都習慣一個人睇戲，曾經試過一日睇3部電影，有觀眾認得我，叫我搵人陪，唔好咁孤獨，其實自己好怕睇戲時喺隔籬有人騷擾，佢鍾意自己一個人睇。」

問到Jennifer怕唔怕被食爆谷聲騷擾，佢話：「可以教大家合埋口食爆谷，自己唔習慣投訴人，之前買鞋個size大咗，唔知點解自己唔識得同人哋講，着住走之後就後悔。試過睇戲隔籬個男仔不斷講劇情俾個女仔聽，講足成場，自己唯有㩒住一邊耳仔，但係都冇出聲。」問佢Jennifer是否唔好意思開口，佢解釋：「除非好嚴重，我坐的士個司機係咁飛車，自己雖然好驚，但係都冇出聲。」

Fish喺新片《非同凡響》 中飾演中度智障女生，是特別社會題材，Fish話角色好大挑戰，導演想安排我成為一個彩蛋：「反應好對我嚟講係一個嘉許，近兩年同Jennifer都算順利，但發覺竟然冇請過同事食飯，日前就一齊請同事食飯。」

精選娛聞，喺晒《娛果》
http://fb.com/appledailyent