周汶錡（Kathy）同妹妺周麗淇（Niki）日前為雜誌影相，懷胎6月嘅Kathy身材依然窈窕，谷奶嘅佢着上黑色透視衫現bratop，性感迷人，影相嗰時Kathy用手遮肚擺甫士，加上被妹妹攬腰合照，令到佢睇嚟完全唔似大肚婆，Kathy再換上印花圖案裙示人，佢話：「夏天鍾意鮮艷顏色，printdress都係我鍾意嘅款式，畀人好有活力感覺。」

至於同徐正曦沐浴愛河嘅Niki，坦言以前偏愛中性打扮，現在就轉咗口味，佢話：「今季好鍾意雪紡，質料又輕又清爽。」雖然早前Niki因家居意外弄傷腳部，但影相嗰時依然表現專業，將春夏新裝演繹得甜美動人。