結果馬隆達搭正凌晨4點半去到巴黎機場,啱啱趕及坐頭班機去倫敦,返屋企瞓3粒鐘就參加車仔操練課。馬隆達諗番起仲係一肚氣:「我肯定如果舒夫真高喺法國打波嘅話,球會一定咩都安排好晒!」其實,大球會成日都大細超㗎啦,鬼叫你唔係超級球星咩?
不過,我求大俠成日坐亡命小巴入屯門,都好明白半夜俾架車拋來掟去嘅滋味,仲要見到其他隊友享受皇帝級待遇就更火滾。好似周一晚預備組賽事上陣嘅波歷克,之前因傷唞咗7個月,期間一邊傷一邊四處飛,仲要攞最高人工。所以馬隆達有乜理由唔嬲?
如果車仔要成為真正嘅大球會,就要協調好同球員嘅關係,老細阿巴莫域治大把私人飛機擺喺機場晒日光浴,點解唔派出去接球員?連里昂都做得到,唔通佢哋連法甲球會都比唔上?咁嘅企業管理同大細超文化,唔怪得G14都唔肯預埋車仔玩啦!