【賢仔Call馬】揸住三項有利條件 何澤堯尾場做「皇者」（廖浩賢）
蘋果日報 2019/12/14 21:14
廖浩賢錶之皇者賢仔call馬
錶之皇者上仗出頭過早，只能屈居第三。
周日（15日）沙田十場泥草地混合賽，草地用C+3欄，馬會特別安排第六及十場的四重彩及四連環合併彩池各有80萬多寶，喜歡刀仔鋸大樹之馬迷記得留意。
騎師方面，李寶利告別戰，戰意不用懷疑，其餘雷神、田泰安、何澤堯、蘇兆輝出足十匹，全日馬膽揀「錶之皇者」，人旺、馬靚、檔好，上述三項條件已足夠言勝。
第十場三班1600米草地，全部熱門馬排外檔，「精神威」前領馬C+3欄啱發揮，但首次跑沙田長直路，究竟捱唔捱到尾係一個疑問？
「魅影揚飛」出動雷神當然恨贏，但首先條件唔好慢閘，「超班福星」及「包裝才子」排十三、十四檔更加被動。
「錶之皇者」係一匹唔起眼但實而不華之馬，上季尾最後一役爆大冷，暑期由文家良接手，承接餘威再下一城，當日用雷神轉彎已經要騎，但越騎就越起勁，好明顯係需要時間迫起後勁馬。
此駒前仗用巴度騎唔熟馬性，上仗換黎海榮就略嫌過早出頭，今次抽二檔情況唔同，起碼賺跑道形勢。
排位朝文家良安排由何澤堯落草地快跳，中段已開始要騎，比機會人和馬一個溝通機會，相信對臨場發揮有好大幫助。
至於最強對手係「翡翠綠」，用蘇兆輝加一檔，豈敢睇低。