年近歲晚，呂師奶當然要循例辦番啲年貨，瑤柱冬菰不可少，今年市道旺，更要買埋鮑魚、花膠、魚翅。辦貨地點梗係西環海味街啲海味舖啦，點知一去到就嚇親，據呂師奶講，「幾間都話鮑魚、魚翅一早沽清，未有貨賣，係好景啫，點會好景到咁緊要？」
唔會冇貨賣嘅，香港係自由市場，缺貨嘅話，價格自然上升，升咗就肯定有供應，唔似泰國係產糖國，但因為政府管制糖價，搞到泰國缺糖。香港乜都冇生產，但從來貨物不缺，最最主要原因就係我哋冇價格管制，小小例外就係的士用石油氣，氣站要與政府議價，於是的士就要排一個鐘頭長龍先至入到石油氣。

呂師奶今年在股市大有斬獲，買鮑魚、魚翅點會買唔到，肯畀錢就得。問佢有乜炒股貼士可以賺錢過肥年，呂師奶話：「使乜貼士，心口寫個勇字，殺入股市係咁買個『中』字，甚麼三三二八、二六二八、二三一八、一○六八，我都炒咗一輪，賺咗十幾萬，夠過年啦。賣晒咯，到年初四再玩過。」點解會買呢幾隻股呢？九四一係中資股王，又唔見佢買？呂師奶話：「夠八夠發吖嘛，你講中移動喎，股票編號係九死一，啋，點都唔鍾意。」
炒股炒短線，有時真係唔夠啲師奶好嘢，好似投資銀行家Ｌ咁，見過唔少風浪，又因為公司嘅「合規」（compliance）程序，去年只係揸重隻五號仔（滙豐），雖然有息收，但諗起啲機會成本，仍然肉痛。好彩佢都有一隻「八」，就係三八六，憑一月效應，追回不少失地！
睇見呂師奶啲「八」咁掂，醒起一月十二日本欄講糖價急升，講到「香港好似冇乜糖股」，之後即刻收到一位熱心讀者電郵，介紹「西王糖業」（新上市冇幾耐），呢隻股嘅編號係二○八八，依稀記得當日（一月十二日），西王糖業嘅股價係兩個七左右，𠵱家寫稿時做緊兩個九，升咗7%，又應咗個發字！咦，二八二都發啫，派完三毫子息，重企硬三個八二五，唔到你唔服。