「大佬B」吳志雄今日60歲生日，佢喺唯港薈設宴30圍慶祝，着住套綠葉圖案西裝到場嘅志雄哥同太太一齊受訪，佢話：「自己一向低調，今次設宴都係家人安排，啲女同老婆話人一世物一世，加上60歲係一個甲子，要隆重啲。」志雄哥話今日壽宴嘅流程都係細女安排，問到佢有咩生日願望，志雄哥話：「世界和平，大家同我一樣開開心心，工作大計方面就係每日都有嘢做，又可以周圍行吓睇下風景、唱吓歌拍吓戲。」

提到身上套綠葉西裝，志雄哥話係太太嘅安排，佢話：「太太知我心意，因為我係演藝界嘅綠葉王吖嘛，所以綠葉要長做長有，希望各位導演俾多啲機會我可以做到綠葉。」

喺志雄哥嘅壽宴上，將會有舞獅助慶，亦有人會扮壽星公祝賀，志雄哥話會換3套衫，都係太太安排。而已到場嘅嘉賓就有陳惠敏、盧惠心、蔡卓妍（Sa）、唐詩詠、張達明、艾威夫婦、梁焯滿、梁敏儀、尹揚明、麥家琪、張文慈、梁烈唯及志雄哥嘅仔女同契子女等，大陸演員梁山山亦有現身。

另外，張文慈話呢幾日忙於周圍飛去登台，但因為全年就係靠呢幾日搵錢，所以都冇辦法，而除咗今晚去志雄哥個生日P之外，佢今日仲去咗喜靈洲戒毒所探訪，佢話聽到啲戒毒人士同自己分享時都喊晒。

更多娛聞，喺晒《娛果》
http://fb.com/appledailyent