中國糧油（506）注資，股價立即彈升，噚日更一度逼近7元大關，收6.76元，再升8仙。
中資股的注資行動會陸續有來，噚日收到料，有兩間公司正密鑼緊鼓進行中，今日先講中保國際（966）。
先睇中保嘅股權分布同架構，中保發行13.42億股，母公司係中保集團持有7.26億股，佔54.5%權益；第2大股東係工銀亞洲（349），持1.06億股（7.98%），另外T.RowePriceInt'l8044萬股（6.01%）及摩根大通6784萬股（5.09%），4大股東已合共持有73.58%，而街外貨源唔少亦係由基金持有，因此流通不多，屬於半冷門股。

傳年底可獲注資

中保係中保集團在港的上市旗艦，多年來不斷注資，現時旗下公司主要的有太平人壽（持50%權益）、太平保險（40%）、中國國際再保險（100%）及華夏再保險顧問（100%）等，主要經營再保險、人壽及財產保險。
一直以來中保業績，都唔算理想，04年（12月結算），虧蝕2300萬元，05年虧蝕擴大到4.33億元。踏入今年，情況有改善，太平人壽和太平保險成立5年後首次錄得盈利，06年上半年，獲利3.28億元，每股盈利24.5仙。集團全年應可錄得盈利，並會考慮恢復派息。
中保集團隸屬中國國務院，旗下有19家子公司，業務已走向國際化，旗下的民安保險（長實（001）持29%、中保持4.9%）計劃年底在香港上市。中資消息指出，在民安上市前後，中保集團會再出招，將子公司業務注入中保，再加以壯大。
中保噚日收6.1元，以06年每股獲利0.5元計，PE約12倍，在內地保險股中屬於偏低，日後再注資，「晒士」大咗，PE亦會上番合理水平，消息指中資人士有信心，未來中保股價會以倍計上升，但揸此股要有耐性，希望明年獲厚利。
郭兆誠