當年今日
關於我們

【睇通睇透】三班都夠贏 何況今仗落四班?(魯賓遜)

蘋果日報 2016/11/22 20:30

魯賓遜睇通睇透

上次沙田日賽十場,澳洲騎師包辦九匹頭馬,今季澳系騎師成績理想,其中羅理雅彈起連贏五日。今期他的五匹座騎,全部都排六檔或以內,有望延續連勝的氣勢,第四場他騎三降四班的「連利進寶」贏面最大。
第四場四班1200米,「連利進寶」的韁口敏感,陣上收慢時難以穩定走勢,快步速場合較啱發揮,故此性能宜跑短途。上季跑田草1200米三次取得一冠一亞一季,在三班亦曾上名,只輸四分三馬位給現評94分的「一片光明」,可見跑短途在三班亦夠贏。今仗降班跑賺級數,1269磅大馬孭重磅影響不大,轉跑谷草面對更弱對手,賺上加賺,換上近期手風大順的羅理雅,初跑谷草亦唔使怕,值得信賴。
同場「野孩子」前仗跑同程排11檔得第二,末段造22秒68快時間,走勢脫胎換骨。上仗增程跑1650米輸氣量,相隔三星期縮程跑番短途,部署啱章法,不能睇小。「雄霸」近兩仗跑三班同程輸唔遠,前仗能夠拍住「得利多」一齊衝,跑四班賽有惡氣。「笑眼光」上場前段唔放,直路又嚴重受阻,敗績不能作準,近期狀態仍勇,要兼顧。