今屆立法會開鑼，少咗一把好有中氣大鬧官員「離晒大譜」嘅聲音，因為民主黨劉慧卿正式告別25年議會生涯，連黨主席都冇做喇。其實卿姐告別議事堂已經有一段日子，但賀佢榮休嘅宴會仍然停不了，好似啱啱過去嘅星期六，民主黨一眾黨友以及支持卿姐多年嘅義工、街坊等，就為佢搞咗個劉慧卿告別議會義工好友聯歡晚會。

卿姐笑言，早喺10月已經告別咗，之不過從政人士要「白過白雪公主，一個斗零都唔貪，好多嘢要跟到實」，因為有好多手尾要執，所以惜別宴就一搞搞到12月囉。
卿姐喺議會工作多年，當然相識滿天下，同卿姐都並肩作戰好多年嘅柯耀林話呀，出席嘅都係好核心、好資深嘅街坊義工同助理，大約筵開十幾圍，若然叫晒所有義工，真係會逼爆！卿姐都笑指如果請晒咁多年助理出席，地方可能唔夠坐。
為咗答謝大家咁賞面，卿姐仲開金口同黃碧雲、陳樹英、區鎮樺等黨友高歌《朋友》、《上海灘》等，令現場氣氛熱辣辣，歡笑聲不絕。卿姐話明雖然冇做議員，但一定後會有期，八方都相信佢一定再喺江湖出現。