做咗民主黨副主席嘅羅健熙就寫咗張「輸都變贏」嘅揮春,當然係揶揄禮義廉劉江華輸咗選舉,竟然贏咗份月入20萬嘅副局長肥缺,所以希望香港人喺未來一年,趕走呢啲「靠輸上位」嘅庸官,一人一票選特首、全面普選立法會。羅健熙話,香港要贏,市民一定要走上街頭,畀政府聽到人民嘅聲音。
退下火線嘅公民黨主席余若薇寫咗張「飯糰、泛團」揮春,希望港人未來一年衣食豐足,又寄望泛民主派團結起來,為市民爭取真普選,廢除功能組別。民主女神話:「全社會都希望民主派團結,政改係重要議題,泛民一定要團結,要好似飯咁樣『黐𣲷𣲷』同市民爭取。」該黨毛孟靜就整咗張「本土為先」揮春,希望政府唔好吓吓都係北望神州搵人仔,顧吓香港人感受。