【新增短片】
政府計劃於19/20年度起建議增加咪錶收費，由現時收費錶路旁泊車位的最高收費定於每15分鐘2元，考慮增至每15分鐘4元或5元，即每小時最高收費為16元或20元。

的士司機劉先生直言少泊路邊咪錶，多數落更後泊一會，一個月也會花百多元至200元在街邊泊車，直言加價後費用加至300、400元難以接受，他說：「加一蚊就差唔多，（加一倍）你搶錢啦簡直，宜家錶位都唔夠，車多就錶少，仲咁樣加法離晒譜。冇辦法㗎啦，政府做嘢就係咁殺雞取卵。」

駕駛人士陳先生：「（加到）廿蚊一個鐘？咁同停車場冇分別啦！我覺得加價唔係重點，而係咪錶太少，好多地方都冇，變咗焗住泊街邊，成日都炒牌，仲衰過泊街邊。其實泊車都係睇邊度方便，增加多啲咪錶同停車位仲實際。」

駕駛人士呂小姐亦指，街邊錶少難找泊位：「其實我都好少用，咪錶加一倍太貴，幅度太大，希望可以調減啲啦。宜家8蚊一個鐘都接受到，但一加加一倍市民負擔真係幾重吓，周圍交通費用都好高，而且街邊好難搵泊位，仲要咁加價，真係難捱，而家生活成本樣樣貴。」

駕駛人士李先生：「宜家根本就係好難搵位，一係等好耐，一係咪兜圈睇吓撞唔撞到位，第時加價始終平過停車場，街邊泊位一定唔夠，就算你同停車場一樣價，呢度始終上落方便過停車場吖嘛，係麻煩在一個鐘就迫住走。（加價會否繼續用？）咁都要㗎啦，唔通博佢炒牌320（蚊）咩？」

駕駛人士許先生：「哇加幅一倍喎，無可奈何咁（繼續）用囉，你咪錶又少，又加價咁多，但停車場又少，（停車場）通常都爆滿，搵泊位好難，警察炒牌又炒得密，有時咪錶位一等都要等半粒鐘先有位，（加價後會否不等？）咁你有需要都係要等。」