人人都話今年股市將會變得瘋狂，華華當然拭目以待。08年一個星期，睇番中港兩地股市，已經有幾隻「黑馬」率先跑出。
首先要講嘅係大陸股市嘅黑馬，正確嚟講唔係「馬」，而係「鴨」。一隻被大陸傳媒形容為會飛天嘅烤鴨。講嘅係北京烤鴨名店全聚德，呢隻上年喺深交所上市嘅「鴨股」，踏入08年後嘅首3個交易日，日日都升停板，烤鴨變鳳凰。

連續3日升停板

話說07年尾，隻烤鴨以59.03人仔股價收爐，元旦後首日開市，烤鴨喺3分鐘內即升10%，見64.93人仔，搞到要停牌。
08年第二個交易日開市，7分鐘後隻烤鴨身價上到71.42人仔，飆升一成，又再升停板。跟住嗰日，亦即上個禮拜五，呢隻烤鴨打破前兩日嘅紀錄，以兩分鐘嘅「時速」飛天升停，過咗冇耐復牌後試過跌落69.04人仔，但晏晝又再升停，呢3日，隻烤鴨仔累計飛升咗33%。
雖則呢隻股，都算受惠奧運概念，因為外國人遊北京、睇奧運，相信都會一試北京名菜烤鴨，但咁衝法，隻烤鴨係咪受咗乜刺激呢？

員工要自我審查

據《新浪財經》講，係因為早前市場傳出，大股東北京首都旅遊集團計劃將北京東來順嘅資產重組，再注資入全聚德，但全聚德喺年尾12月28號已發通告，話冇咁嘅計劃，未來3個月都唔會有。不過，散戶一於「執迷不悟」，喺咁撩隻烤鴨，咪搞到佢high咗囉。據大陸《新京報》引述全聚德某位員工講，全聚德內部做咗自我審查，而監管部人員亦向全聚德嘅員工進行調查，查問佢哋有冇買全聚德股票，有冇喺公司董事或高層度收到「小道消息」咁話，搞到員工都唔敢輕舉妄動。
查實全聚德上年11月20號上市以嚟已經成日升停，掛牌日仲開創上市首日最快升停紀錄，以42.3人仔報收，比11.39人仔嘅發行價幾乎翻咗兩番。

電郵：mailto:[email protected]