當年今日
關於我們

扮嘢寫真玩SM霆鋒
黃秋生搞到鄭秀文流鼻血

蘋果日報 2002/01/09 00:00


黃秋生新唱片《BadTaste》中附送的扮嘢寫真集,早前已將郭富城及陳曉東形象玩到天翻地覆。唱片推出在即,他再度使出扮嘢本色,今次要埋手的是形象百變的鄭秀文,秋生更將對方玩到流血做賣點。
黃秋生明日推出的新大碟《BadTaste》中,將隨碟附送模仿多位歌手的唱片封套造型寫真集,他除將百事郭富城扮成「腩肉城城」、及將擘腿東東(陳曉東)變成搞笑的「爆呔東東」後,樂壇天后鄭秀文(Sammi)都難逃一劫,秋生把Sammi《ShockingPink》一碟中的粗眼線配火辣紅唇形象,變成「鼻血天后」。

扮Sammi扯火
秋生為了傳神地演繹Sammi的造型,不但要花個多小時學她畫粗眼線,還要扮Sammi做出露齒的性感效果,不過人家是露出性感的上齒,他則以煙屎牙示人。秋生昨日說:「我已經好努力露上齒,但整極都整唔到,先知道Sammi上顎啲牙原來咁大隻,最後露唔到上齒,咪惟有露下齒囉。重有佢條化到好似做大戲嘅眼線,先至搞到我扯火,個勾位化咗個幾鐘先搞得掂,扮佢真係好鬼煩!經過今次,我都服咗Sammi。」
而霆鋒的《玉蝴蝶》一碟在秋生的「改造」下,原先手拿油燈的他頓時變成左手揸蠟燭、右手持皮鞭,極有《人肉叉燒包》變態佬味道的「SM霆鋒」。
自資出老翻
除了Sammi、霆鋒及東東外,古天樂及莫文蔚亦成為他今次扮嘢寫真集的主題,而秋生似乎對形象百變的城城及最近被向太陳嵐狂鬧的陳曉東情有獨鍾,繼「腩肉城城」外,還加多一輯站在尿缸前的「如廁城城」,而東東另一輯的神來之筆,就是在鼻窿上加執鼻毛,變成「露毛東東」,認真抵死。
秋生續說:「呢本寫真製作費好貴,因為遠赴柴灣取景,所以製作費花咗一百萬零一蚊。幫我做發行嘅滾石唱片已經包咗我五千張唱片,見個勢咁好,我已經打算嚟緊幫自己出埋老翻。」