八方噚日先同大家講咗，特首梁振英、政務司司長林鄭月娥同埋財政司司長曾俊華齊齊放假，搞到律政司司長袁國強要過Lonely Christmas，教育局局長吳克儉前日仲出埋事，搞出個報警拉《蘋果》記者嘅大頭佛！唔少政圈、官場中人均擰晒頭，事關呢單嘢已辣㷫唔少記者，「奶媽」林鄭今日又開始放假，萬一越燒越大，真係唔知邊個幫吳克儉補鑊！
官場中人都知，其實傳媒追訪官員、政界人物唔係今日先有，特首梁振英試過、發展局局長陳茂波又試過，連律政司司長袁國強都俾傳媒跟過，冇一個人會「聰明」到搵政策局或部門代為報警！

以往靠奶媽補鑊

該官員又同八方講咗個故事，記得煲呔年代有個高官俾某傳媒跟咗幾日，雖然好煩但都冇出聲，直到有日佢同親朋戚友食飯，於是走去同跟佢嘅記者講，佢同親友食飯，食完就返屋企，希望記者一陣唔好影相嚇親班親友，咁個記者亦都識做。點諗到今時今日有官會報警拉記者！
另一政圈中人同八方講，以往吳克儉出事，都係「奶媽」林鄭幫佢補鑊，好似國教、中學收生不足等等，最後都係「奶媽」出手，佢話好多記者同佢講，不滿吳克儉咁做，𠵱家「奶媽」又放假，萬一件事越搞越大，邊個去救火補鑊？佢仲講笑咁話，政府話咗獨留兒童在家好危險，𠵱家賴低儉儉就出事！連公民黨陳家洛都同八方講，儉儉出咗名係有事就閃，可能真係奶媽唔喺度就要報警求助！
李八方
mailto:[email protected]