南港島線今朝正式通車，唔少鐵路迷天未光已經等住開閘搭頭班車，而喺擠擁人潮中，香港眾志嘅黃之鋒都在場。嘩，天寒地凍下都肯五點幾捧場，唔通都係鐵膠？之鋒喺Facebook解謎，呢位十幾年海怡街坊話五點幾起身去海怡半島站，諗住坐到頭班車，點知落到去發現5點55分嘅頭班車已經迫滿人，所以揀咗坐6點鐘嘅第二班車去金鐘，因為本身都要返立法會攞單張喎。

而喺上車前，佢仲即場做Facebook Live，驚訝咁早都有50幾60人睇緊，仲化身記者採訪在場搭客，聽到有人話只係嚟湊熱鬧，之鋒就話佢都係，再三強調「我真係唔係一個鐵膠」。佢話約十分鐘已經到金鐘，覺得三卡車真係唔夠，繁忙時間搭客好難喺利東上車，希望港鐵增加班次。

佢仲喺車卡selfie，身後有熊貓公仔，而佢嘅留言係：「熊貓好似中咗毒咁...」