以貌取人，失之子羽。電影《D-9異形禁區》係小妹近年最愛，一群醜陋外太空生物嚟到，被人類當次等生物隔離，直至一個地球人飲咗化學品變醜怪外星人，終於感受到被歧視嘅痛苦。套片嘅主概念設計師GregBroadmore，往往將醜陋轉化為另一種美，好似佢舊作《金剛》嘅大猩猩，《魔幻王國》嘅羊男。

電影精品有平有貴

Broadmore嚟咗香港，因為佢所屬嘅WetaWorkshop喺數碼港開咗亞洲首間專門店，小妹見到《D-9》把槍，即刻借嚟扮羅拉，但賣$3,900太貴，買個鎖匙扣補償算喇。金剛模型都好吸引，佢企喺帝國大廈頂捉住架飛機，手工精細$700唔算太貴（尤其比起漫畫節啲figure…），《魔幻王國》嘅羊男像都係$700。小妹最鍾意《魔戒》嘅咕嚕（又係最醜嗰個），但原來佢嘅像係非賣品。
呢度仲搭單賣埋其他產品，包括《異形》，個異形像真嘅一樣，但賣萬幾蚊太貴。一系列恐龍蛋，恐龍仔好惡死咁破蛋而出，大大個都係賣$490。
齋睇都得，同場有展覽，以Broadmore近年新作Dr.Grordbort's，佢話係純創作，同電影無關，講一個虛擬嘅舊年代，當時有好多奇異怪獸、新奇武器；部份展品逼真到以為佢哋真係喺地球出現過。粉紅色冇嘴貓，小妹冇乜興趣，因為覺得公仔越醜越可愛（唔包括男友）。
電郵：mailto:[email protected]