一位投資很了得的朋友話，最聰明的投資便是減價時買貴貨，平時買平貨，因為四萬一個手袋，五折，立即慳了兩萬，買件三百蚊衫，五折，只能慳百五。我不喜歡買樓，亦冇錢買我想住的樓，那朋友整天就叫我買樓，最近聽另一些朋友話西環有些舊樓對海，很值租，於是我又去問投資專家，他說，如你有一百萬，最蠢的人就是將一百萬full payment去買一間屋。有一百萬就去買一間好地區的三百萬屋，只要升30%，你都入袋一百萬。如果你要等西環一百萬樓升100%就眼眉毛長！聽落又好有道理。

不過，我又發現一個超好投資，這就是魚子醬。講到魚子醬，一定要介紹「J&A」給大家，因為由最貴至最平的魚子醬在「J&A」都有得賣。店主Jason常教我吃魚子醬，我最喜歡他常給我的測試是，開十罐八罐魚子醬，大家試味，評評分。以前可能仍在貴嘢便一定好的階段，所以覺得Beluga超然。起初Jason介紹我吃人工自養魚子醬，我還藐藐嘴，farmed的那可和wild相比。但是互相比較，Beluga很鹹，Jason說就是因為是wild，所以一年只做一次至兩次魚子醬，要將新鮮魚子keep一年，所以要加多些鹽。食了六、七年farmed魚子醬，反而覺得非常甘香，不腥，食完，個aftertaste會留在口腔和喉嚨，尤其最近Jason介紹的「Imperial」，更不可置信的是原來是中國史氏鱘。

我跟Jason去過千島湖的fish farm，千島湖很平靜，船一路去，天連水，水連天，隔一陣又有一個小島，我以為自己在北歐！水又清，那麼好環境，我都想去住啦！所以想想，魚點會唔開心，所以魚子醬特別好吃。不過Jason說工廠起初用中國鹽來醃，但是有泥味和魚子醬帶苦。現在改用德國鹽，就啱數了，我舉腳讚好。我要多謝幾位恩人，聖誕都送了「Imperial」。

各位有錢佬，聖誕新年可開個魚子醬tasting party，買幾罐魚子醬試食，包你個party好受歡迎，一定抵番數，因為有排講。不過記得去Great買些blinis，因為toast不溶在口，blinis比較鬆，和魚子醬一同溶在口，正！

J&A Fine Food Ltd
地址：牛頭角偉業街116號聯邦工業大廈11樓A室
電話：2175 0818
營業時間：星期一至五9am-6pm

（原文刊於2008年700期《飲食男女》）

蘇施黃Profile
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。

立即免費下載《飲食男女》App ： http://onelink.to/etwapp
《飲食男女》網站 ： http://etw.hk