吳鎮宇、袁詠儀（靚靚）、張達明、吳肇軒、蔡頌思日前齊齊出席電影《家和萬事驚》喺北京舉行嘅記者會。今次係靚靚同鎮宇繼04年《我愛天上人間》之後再演夫妻，佢兩個一上到台就不停互笠高帽。事隔多年，鎮宇再扮演靚靚老公，佢笑言事前特登去請教張智霖，仲好大膽咁公開話，全香港都冇女演員好似靚靚咁，可以演活呢種潑辣嘅角色。

《家和萬事驚》改編自張達明獲獎舞台劇，講述鎮宇一家五口為保衛「海景房」而做出一堆啼笑皆非嘅事，荒誕喜劇下反映出時下貼地寫實嘅房屋問題。戲中飾演家庭支柱嘅鎮宇，同時亦係家庭地位低微嘅好男人。而演賢慧家庭主婦嘅靚靚就自封「麻煩製造機」，鎮宇用國語笑指：「她演得很好又傳神，全香港沒有女演員能像她這麼潑辣了，哈哈！」

至於張達明戲中就演一個被人忽視，連孫同仔都可以欺負佢嘅家庭包袱，需要化老妝，張達明覺得最大挑戰，係演鎮宇嘅爸爸，佢笑言：「吳鎮宇那麼帥，我怎演他爸？」而演下一代嘅吳肇軒同蔡頌思，就話好開心可以同一班前輩合作，學到好多嘢。

精選娛聞，喺晒《娛果》
http://fb.com/appledailyent