夏主席請專欄作家睇跑馬，到沙田馬場七樓主席廂房食自助餐。分兩圍坐。專欄作家大都好純情，唔識賭馬，講嘅多，下注嘅少，食家薛與ＤＪ任得到阿叻貼士，話要買第一口孖Ｔ，頭關兩膽四腳，尾關四隻互穿，共十六注，夏主席立刻拎一百六十蚊出嚟畀食家薛：「預我一份，幫補吓投注額都好吖！」結果呢，大家齊齊做咗善事，不望回報。
作家李與韓公相識五十年，性格迥異，韓公十幾年前經常到沙田馬場，久唔久就中大冷門，對賽馬十分熟悉。作家李寫政論就冇得彈，對四隻腳就認識極少，每場問馬會高層攞貼士。馬會高層識馬而不得投注，場場講四隻最熱嘅馬，作家李聽晒話，四穿六下注位置連贏，連續三場都收錢，笑得好開心。蘇阿美烏垂垂，以為作家李贏好多錢，問聲：「贏咗幾多呀？」作家李話：「你真唔識趣，問有冇錢收就得啦，點解要問贏錢幾多？」蘇阿美竟然唔明，左丁山掩住嘴笑，星期三晚頭三場嘅熱門位置Ｑ邊度有肉食吖，收番嘅錢唔夠冚番啲本錢！

如此場合講賽馬，嘻嘻哈哈就過晒癮，想專心落注就好難，難得韋八少如老僧入定，不為所動，佢話五十年來只賭過一次馬，但對馬場掌故甚為熟悉，講古仔冇人夠佢講。至於清水田，嚟到馬會主席廂房，唔通講範式轉移，中西文化大挪移，中學為體、西學為用之謬誤咩？惟有與人類剛講吓管治形勢，可惜夏主席唔會競選新的特首啫，否則佢兩個就係現成軍師。
提起特首，左丁山特登走出去睇吓人稱肥龍嘅董事許在哪裏，點知呢晚佢冇出現，於是問夏主席：「許先生辭咗董事職位未？」主席話：「未有聽聞，不予評論，任何人如果出任政府大官，就會辭職。」主席係太極高手中之高手，答到潑水不入，惟有講番跑馬。